نتیش کمار نے صفائی ملازمین کمیشن کے قیام کا اعلان کیا

پٹنہ، 27 جولائی۔ وزیر اعلیٰ نتیش کمار نے اتوار کی صبح بہار میں صفائی ملازمین کمیشن کے قیام کا اعلان کیا ہے۔ گذشتہ روز ہفتہ کی صبح انہوں نے صحافیوں کی پنشن بڑھانے کا اعلان کیا تھا۔ نتیش کمار نے آج صبح ایکس پوسٹ میں لکھا کہ بہار میں صفائی ملازمین کے حقوق اور مفادات کے تحفظ، بہبود، بحالی، سماجی ترقی، شکایات کے ازالے اور مختلف فلاحی اسکیموں کی نگرانی کو یقینی بنانے کے لیے محکمہ کو ہدایت دی گئی ہے کہ وہ بہار ریاستی صفائی ملازمین کمیشن تشکیل دیں۔ انہوں نے کہا کہ یہ کمیشن صفائی ملازمین کے مفادات، ان کے حقوق کے تحفظ کے حوالے سے حکومت کو تجاویز دے گا اور صفائی کے کام میں مصروف لوگوں سے متعلق فلاحی اسکیموں کا جائزہ لے گا اور اس پر عمل درآمد کے لیے مناسب کارروائی کرے گا۔ بہار ریاستی صفائی ملازمین کمیشن میں ایک چیئرمین، ایک نائب چیئرمین اور پانچ ممبران ہوں گے، جن میں سے ایک خاتون/ خواجہ سراؤں ہو گا۔