یورپی دورہ : بیلجیئم نے ہندوستانی اے مردوں کی ہاکی ٹیم کو 1-3 سے شکست دی

۔ ہندوستان کی جانب سے واحد گول کپتان سنجے نے کیا اینٹورپ (بیلجیئم)، 18 جولائی (ہ س)۔ ہندوستان ’اے‘ مردوں کی ہاکی ٹیم کو یورپی دورے کے دوران جمعرات کو بیلجیئم کے خلاف کھیلے گئے میچ میں 3-1 سے شکست کا سامنا کرنا پڑا۔ یہ میچ اینٹورپ کے اسپورٹ سینٹرم ولرجکسیپلین گراونڈ میں کھیلا گیا۔ ہندوستانی ٹیم کی جانب سے واحد گول کپتان سنجے نے کیا۔ بیلجیئم نے میچ کا آغاز تیزی سے کرتے ہوئے پہلے ہی کوارٹر میں تین گول کر کے ہندوستان پر ابتدائی دباو بنا دیا۔ حالانکہ اس کے بعد ہندوستانی کھلاڑیوں نے تحمل کا مظاہرہ کیا اور بہتر کھیل کا مظاہرہ کیا اور گیند پر کنٹرول برقرار رکھا۔ ہندوستان کی طرف سے واحد گول آخری کوارٹر میں ہوا۔ میچ کے بعد ٹیم کے کوچ شیویندر سنگھ نے کہا، ’’حالانکہ آغاز قدرے کمزور رہا لیکن مجموعی کارکردگی اچھی رہی۔ ہم نے جلدی گول گنوائے، لیکن پھر واپسی کرتے ہوئے کھیل پر قابو پالیا۔ گیند کی پوزیشننگ بہتر تھی اور ہم نے بہت سے مواقع پیدا کیے، اب ہمیں فنشنگ پر زیادہ توجہ مرکوز کرنی ہوگی۔‘‘ انہوں نے مزید کہا، ’’یہ کھلاڑی دنیا کی ٹاپ ٹیموں کے خلاف کھیل رہے ہیں اس لیے ان پر کافی دباو ہے۔ اس کے باوجود یہ نوجوان کھلاڑی اعتماد کے ساتھ کھیل رہے ہیں۔ یہ دورہ ان کی ترقی کے لیے بہت اہم ہے۔ اب ہمیں اپنا اگلا میچ دنیا کی نمبر 1 ٹیم ہالینڈ کے خلاف کھیلنا ہے۔ ایسے تجربات مستقبل میں ان کھلاڑیوں کے لیے سود مند ثابت ہوں گے۔‘‘ ہندوستان ’اے‘ مردوں کی ہاکی ٹیم اب 18 جولائی اور 20 جولائی کو رات 9.30 اور 8.30 (ہندوستانی وقت کے مطابق)بالترتیب دو اہم میچوں کے لیے آئنڈہوون (ہالینڈ) جائے گی اور دورے کا اختتام مثبت نتیجے کے ساتھ ہونے کی امید کرے گی۔