آسٹریلیا کے خلاف ٹی 20 سیریز کے لیے ویسٹ انڈیز کی ٹیم کا اعلان، جیول اینڈریو اور جیڈیا بلیڈز کو پہلی بار موقع ملا

جمیکا، 17 جولائی (ہ س)۔ ویسٹ انڈیز کرکٹ بورڈ(سی ڈبلیو آئی) نے آسٹریلیا کے خلاف آئندہ پانچ میچوں کی ٹی 20 انٹرنیشنل سیریز کے لیے 16 رکنی اسکواڈ کا اعلان کر دیا ہے۔ سیریز 20 جولائی سے 28 جولائی تک جمیکا کے سبینا پارک اور سینٹ کٹس کے وارنر پارک میں کھیلی جائے گی۔ ٹیم میں آئرلینڈ کے خلاف حالیہ سیریز میں جیت کے اہم کھلاڑیوں کو برقرار رکھا ہے، جب کہ دو نوجوان اور باصلاحیت کھلاڑی جیول اینڈریو اور جیڈیا بلیڈز کو پہلی بار ٹی 20 انٹرنیشنل اسکواڈ میں شامل کیا گیا ہے۔ 18 سالہ جیول اینڈریو، ایک ابھرتے ہوئے بلے باز اور بیک اپ وکٹ کیپر نے اپنے جارحانہ کھیل سے خاص طور پر اسپن گیندبازی کے خلاف سلیکٹرز کو متاثر کیا۔ انہیں خطے کا مستقبل کا ستارہ سمجھا جاتا ہے۔ وہیں بائیں ہاتھ کے تیز گیند باز جیڈیا بلیڈز نے 2024 میں بنگلہ دیش کے خلاف بین الاقوامی سطح پر ڈیبیو کیا۔ انہوں نے ویسٹ انڈیز بریک آوٹ لیگ میں پاور پلے اوورز کے دوران شاندار کارکردگی کا مظاہرہ کرتے ہوئے سلیکٹرز کی توجہ حاصل کی۔ شائی ہوپ ٹیم کی کپتانی برقرار رکھیں گے جبکہ جیسن ہولڈر، اکیل ہوسین اور روومین پاول جیسے تجربہ کار کھلاڑی بھی ٹیم میں شامل ہیں۔ ٹیم کے ہیڈ کوچ ڈیرن سیمی نے کہا کہ ٹیم کی بنیادی توجہ رینکنگ کو بہتر بنانا اور 2026 میں ہندوستان اور سری لنکا میں ہونے والے ٹی 20 ورلڈ کپ کی تیاری ہے۔ انہوں نے کہا، ’’ہماری حکمت عملی اور ہدف واضح ہے - 2026 میں ٹی 20 ورلڈ کپ جیتنا۔ اس سیریز میں، ہم اپنے انداز اور کھیل کے برانڈ کو مزید بہتر بنانے کی کوشش کریں گے۔‘‘ ویسٹ انڈیز کی ٹی 20 ٹیم درج ذیل ہے: شائی ہوپ (کپتان)، جیول اینڈریو، جیڈیا بلیڈز، روسٹن چیس، میتھیو فورڈ، شمرون ہیٹمائر، جیسن ہولڈر، عقیل حسین، الزاری جوزف، برینڈن کنگ، ایون لیوس، گڈاکیش موتی، روومین پاول، آندرے رسل شیرفین ردر فورڈ، روماریو شیفرڈ۔ ویسٹ انڈیز بمقابلہ آسٹریلیا شیڈول: پہلا ٹی 20: 20 جولائی – سبینا پارک، جمیکا دوسرا ٹی20: 22 جولائی – سبینا پارک، جمیکا تیسرا ٹی20: 25 جولائی – وارنر پارک، سینٹ کٹس چوتھا ٹی20: 26 جولائی – وارنر پارک، سینٹ کٹس پانچواں ٹی20: 28 جولائی – وارنر پارک، سینٹ کٹس