بہار کے عوام کو نتیش حکومت کا تحفہ، یکم اگست سے 125 یونٹ بجلی مفت

پٹنہ، 17 جولائی (وقت نیوز سروس)۔ بہار کی نتیش حکومت نے ریاست کے 1 کروڑ 67 لاکھ بجلی صارفین کو بڑا تحفہ دیا ہے۔ ریاستی حکومت نے ماہانہ 125 یونٹ بجلی مفت دینے کا اعلان کیا ہے۔ وزیر اعلیٰ نتیش کمار نے آج صبح ایکس پر پوسٹ کرکے یہ اعلان کیا۔ انہوں نے کہا، "ہم لوگ شروع سے ہی سب کو سستے شرح پر بجلی فراہم کر رہے ہیں۔ اب ہم لوگوں نے فیصلہ کیا ہے کہ یکم اگست 2025 سے، یعنی جولائی کے مہینے کے بل سے ریاست کے تمام گھریلو صارفین کو 125 یونٹ تک بجلی کے لیے کوئی رقم ادا نہیں کرنی پڑے گی۔ اس سے ریاست کے کل 1 کروڑ 67 لاکھ خاندانوں کو فائدہ پہنچے گا۔" وزیر اعلیٰ نے یہ بھی کہا کہ آئندہ تین سالوں میں ہم لوگوں نے یہ بھی فیصلہ کیا ہے کہ ان تمام لوگوں کو تین سالوں میں بجلی فراہم کی جائے گی۔ گھریلو صارفین کو ان کے گھروں کی چھتوں پر یا قریبی عوامی مقام پر سولر پاور پلانٹس لگا کر فائدہ پہنچایا جائے گا، ریاستی حکومت انتہائی غریب خاندانوں کے لیے شمسی توانائی کے پلانٹ لگانے کی پوری لاگت برداشت کرے گی اور اس کی وجہ سے گھریلو صارفین کو 1 سے 2 یونٹ تک بجلی خرچ کرنے کی ضرورت نہیں پڑے گی۔ آئندہ تین سالوں میں ریاست میں ہزار میگا واٹ شمسی توانائی دستیاب ہوگی۔